2024 წელი ლევილში „საქართველოს წლად“ გამოცხადდა, რაც საზეიმოდ აღინიშნა 27 იანვარს, ლევილის მერის საახალწლო მიღების ფარგლებში. ღონისძიება ქართული სუფრისა და კულტურული პროგრამის თანხლებით გაიმართა და სხვადასხვა თაობის სტუმრები გააერთიანა.
საღამოს მუსიკალურ და ქორეოგრაფიულ ნაწილს ქართველთა კულტურის კერა „ლაზი“ წარმოადგენდა, რომელმაც ქართული ცეკვისა და სიმღერის პროგრამა წარადგინა. ქართული სუფრა ორგანიზებული იყო Colchide-ის მიერ.
ღონისძიებას ასევე ესწრებოდა საქართველოს ელჩი საფრანგეთსა და მონაკოში გოჩა ჯავახიშვილი.
„ლაზისთვის“ ამ ღონისძიებაში მონაწილეობა განსაკუთრებული მნიშვნელობის იყო, რადგან ცენტრი 2024 წელს დაარსებიდან 15 წლის იუბილეს აღნიშნავდა. ლევილში დაბრუნება სიმბოლურად დაუკავშირდა იმ მრავალწლიან კულტურულ საქმიანობას, რომელსაც „ლაზი“ წლების განმავლობაში ახორციელებდა.
